《与谍》爆笑NG　心颖打中张頴康下体

无綫剧集《与谍同谋》已经播到接近尾声喇，剧情愈嚟愈紧张，皆因个个都想知喺剧中罗嘉良（捞家）同佢个仔郑俊弘（Fred）嘅关系，最终能唔能够和好如初，而李佳芯同Fred呢对系咪真系会发展恋情呢？所以网友都话每晚都要担定櫈仔追睇，务求唔可以错过每分每秒嘅情节，可见《与》剧嘅威力系几咁劲呀！

胡仔为艺术牺牲

而无綫官方Facebook专页就因应热潮，上载一段收辑咗剧中嘅爆笑NG幕后花絮，当中有唔少绝密片段，哗！绝密喎，难怪网友都大嗌好正，唔睇唔得㖭！相信大家都记得其中一幕讲到赖慰玲病咗，胡诺言（胡仔）就要喂佢食粥，但畀佢食咗一啖就喷晒出嚟，喷到胡仔成面都系，胡仔简直系完美示范咩叫做为艺术牺牲，喷到成面都系，佢仲要继续笑晒口，呢啲咪叫做专业啰！网友都大赞胡仔非常敬业，戥佢阴公猪，可能分分钟畀慰玲喷咗N咁多次。

Fred讲错事后感

而另一场就系开会嘅戏，Fred原本都讲得非常顺畅，就话用家试完佢哋公司嘅产品后，可以分享事后感，咦，事后感？应该系用后感至真，Fred讲完之后都令全场爆笑，网友都话Fred真系要小心用词，差少少令成个意思都好唔同㗎喇！虽然胡仔同Fred都各有搞笑之处，不过讲到最惨就一定系张頴康（康仔），因为佢经历男人最痛，佢本身就英雄救美，救出醉咗嘅黄心颖，成件事不知几Man。不过醉咗嘅心颖就唔小心打中康仔下身男人最痛之处，康仔表情表现痛苦，场面非常搞笑。唔少男网友睇完呢一幕都话隔住个Mon都感受到康仔嘅痛，讲到身同感受，认真夸张！网友叫心颖真系要小心，康仔仲要生第二个㗎！总之网友都超Like呢啲绝密片段，大赞好有惊喜。