专栏名称: 吴语

希望一道来传承保护我们的母语：吴语！上海，苏州，无锡，常州，丹阳，启东，海门，靖江，高淳，溧水，宣州，杭州，嘉兴，湖州，绍兴，宁波，舟山，金华，衢州，台州，温州，丽水，上饶，我们都是一家人！新浪微博：吴语传承与保护小组

【吴语有声故事会】吴江民间奇人传说：吴传一与丁一和尚 |吴语公众号

吴语 · 公众号 · · 2017-05-19 20:09

正文

什么是吴语？吴语公众号

吴语区全图

什么是吴语？吴语是一门历史悠久的语言，通行于上海、浙江、江苏南部、皖东南+赣东北边界。其中上海、浙江北部大部分、江苏南部大部分，同属吴语最大的一个分片：吴语太湖片。（图上所有泛蓝色地区）。包括了苏州话、上海话、宁波话、常州话、绍兴话、无锡话等一系列子方言。

如果喜欢，请记得点右上角分享本文到朋友圈

苏州吴江的七都镇历史悠久，春秋时期更成为吴越界首，五次吴越水上大战就是在这里发生的，所以现在还留有一个名为“吴越战”的自然村。

今天，由一位七都老人给大家讲述两个七都的古代奇人传说。

本录音材料来自吴江档案局"吴江通"

讲述人：周建明

文本正字修订：嬢嬢

点击下方按钮开始播放故事，故事原文文本在下方

以下故事原文全部用吴江七都方言的吴语正字书写。

如果感到阅读有难度，可以戳最下方的阅读原文链接 跳转到吴江档案局发布的现代白话文版的。

老娘舅的异术

　　我来自七都，我代表七都嗰方言，讲两只小小个民间传说故事，我叫周建民，今年58岁。

▲吴溇（沈丽萍摄）

　　第一只故事呐，七都吴溇一带，有个老娘舅嗰传说，老娘舅嗰名字呢叫吴传一，嘞起元朝末年嗰辰光出生嗰吴溇人，伊徕小嗰辰光呢就聪明得来不得了，还加有个道士呢教过伊，故咾呢，恁介乖点嗰，像个活仙人,有一趟(thon)，有个人要过太湖到洞庭山丄起，那么到太湖边丄么，啊呀，正好呒没船，那么吴传一呢，朝嗰过太湖嗰人介话，我搭你弄只芦头叶子做只小船，你那就闭霎两只眼睛，立嘞箇只芦叶船丄，不过你千万弗好睁开眼睛，只要你听到喜鹊叫嗰辰光,才好两只眼睛张开，那么箇个人呢照伊去做爻，未玱(mi tshian刚才)一立到船头丄去么，只听到耳朵塰边啊，吼吼吼，风啊，特别快，像得空中嗰腾云驾雾介快，未玱(刚才)一歇歇么，就听到喜鹊叫得呀，箇个人较眼睛一睁开么，哇咿，真嗰洞庭山丄到也到爻。

　　有一日呢，有个贩毛猪生意嗰人，箇只船呢有几十只毛猪，搭吴溇江丄过，吴传一呢，正好立起桩桥丄，伊搭贩毛猪嗰人淘汕(开玩笑)孛相，朝嗰贩毛猪嗰朋友介话：“你嗰毛猪哎要畀一只我，你肯定赚大钞票哎”贩毛猪嗰人啊一听呢：“如何呀，你箇个猪头三热沉啊，你箇只面孔阿要爻”未玱(刚才)介话么，箇只船啊去杠脱沿滩丄，那么箇几十只毛猪侪逃到岸丄来爻，还加四面八方连牢嗰，贩毛猪箇个朋友么，抓来抓去，一只也抓弗牢呀，还加江滩丄么滑一滑么，滚一滚，坐得一屁股泥哎，伊就坐徕江滩丄啊叹长气哎，弄得来么精疲力尽哎，结果呒没办法，只得求嗰吴传一呢帮忙，外加答应吴传一呢，顶大箇只毛猪呢送畀你爻，而吴传一呢一听呐，一脚就跳到船丄，喔嘬嘬，未玱(刚才)喊一声么，几十只毛猪全部到到船丄来爻呀，就顶大箇只猪呢弗肯跑上来，那么贩猪嗰朋友介话：“箇只猪呐就畀徕为先生爻”

　　有一趟(thon)呢，吴传一搭几嗰小弟兄啊，一道摇箇只船啊到湖州去孛相，那么叫米么带得少爻，到第二日呢，点心就出脱，侪家饿死爻。正好碰着一家人家抬嘞轿子咾讨新娘子，吴传一呢叫小弟兄啊轻轻较跟牢伊(省略)拉，摇到个讨新娘子嗰村坊丄起，未玱(刚才)箇只船未玱(刚才)一停到么，吴传一上岸爻，只看见结婚嗰人家，括客人啊括亲眷人家面孔全是急煞人也噶，那么吴传一打听打听，啥事体咾，新娘子未玱(刚才)一到新房么，坐到床丄么，肚皮痛得来发滚嗰，看样子凶多吉少，那么主家人家也急煞爻，吴传一胸猛一拍咾，伊介话哎，我看的好噶，𠏕(休要合音，意为不要)急𠏕急，那么主家人家听得快活(开心)煞爻呀，快点请吴传一到新房里去，只见箇吴传一嗰头一竵(hua，意为斜)么，擦了一点点皮屑么，做三粒小药片呀，叫箇新娘子用温开水吃下去，未玱(刚才)吃下去么，想娘子好啊好爻呀，那么主家人家非常嗰感动，要用银两呢送畀嗰吴传一，吴传一介话：“银两么我𠏕爻，你只要弄啊一桌酒水，弄到我船丄，发到我桌丄，我已经心满意足爻，那么主家用最好嗰酒菜发一桌船丄哎，箇帮小弟兄么吃得来么酒足饭饱哎，那么到伊屋里儿(lin)来。吴传一后来呢从军反元朝,死嘞军中，后来呢侪家称伊吴才一呢叫神仙相公嗰。

丁一和尚接驾

我再搭大家呢侪家呢再讲嗰民间传说故事，箇只故事呢叫丁一和尚接驾，接驾么就是接皇帝，嘞起清朝年间，秒智寺一位文武双全介嗰高僧，伊嗰法名呢叫丁一，一只丁嗰丁，一二三四一，丁一和尚呢聪明超人嗰和尚，伊搭杭州灵隐寺昭庆寺嗰方丈呢既亲密又深交，关系呢是称兄道弟嗰，有一年呢，乾隆皇帝下江南，第一来就到秒智寺，丁一和尚搭乾隆皇帝讲古代，讲今朝，谈论说武，得到了乾隆皇帝嗰高兴头嗰快活(开心)，那么乾隆皇帝呢是个伊文也来武也来嗰皇帝，他呢有意思呢要掂量掂量丁一和尚箇个水平嗰斤两。

▲清乾隆《震泽县志》载妙智寺（照片来自网络）

第二日功夫，乾隆打扮一个老百姓，要丁一和尚陪他到街丄去转孛相点。那未玱(刚才)路过一爿吃食店，香味扑鼻而来，香来不得了，乾隆问丁一和尚：“大师父，世丄啥嗰东西最好吃？”丁一和尚介话：“饥啊，饥（鸡）最好吃。”乾隆笑着介话：“大师哦你佛门子弟，哪会得话鸡最好吃呢？”丁一和尚介话：“我话嗰饥弗是一只鸡嗰鸡，是人饥饿嗰饥，所以叫饥饿最好吃。”乾隆皇帝呢点点头。

那么走啊走啊，弗意中乾隆看见一只黄狗徕起一个菜摊头丄射水(尿)呀，水呢正好射徕嗰豆芽菜丄，丁一和尚要老早看着箇爻这种情况。乾隆又要问丁一和尚爻：“世界丄啥嗰东西最干净？”那么丁一和尚想啊，照道理么就豆芽菜是弗种嘞泥里，也弗用化肥，弗用垃圾嗰营庄嗰，哎应该是最清爽嗰，不过丁一和尚晓得乾隆皇帝是有意识为难伊，他就介话：“眼弗见为净最干净。”乾隆皇帝听后，蛮服帖嗰，伊笑笑。

那么边走边讲孛相，正好走到一家竹器店门前，乾隆皇帝脚步停爻，问箇个丁一和尚：“箇些啥嗰东西啊？”那么丁一和尚么，晓得乾隆皇帝有意识来找伊嗰错头啊，我讲的实实在在嗰讲呢叫篾青（灭清）篾黄（灭皇），灭清就是灭清朝政府，伊要灭皇帝啦，箇是要犯杀头之罪嗰赛过。那么一想呢，就看伊朝箇个乾隆皇帝介话：“皇上啊，箇括么叫竹皮（篾青），箇括么叫竹肉（篾黄）。”乾隆啊打心底里啊正刚蛮服帖丁一和尚嗰聪明。

那么两日之后啊，乾隆皇帝塞过经过钱塘江丄要到杭州去继续南下。灵隐寺搭昭庆寺嗰方丈晓得乾隆皇帝这嗰人呢文也来武也来嗰皇帝，蛮难应酬伊嗰啦，那么伊拉两嗰方丈想着嗰丁一和尚，叫伊代驾接皇帝，那么哎，丁一和尚呢就快马加鞭咾火速赶到杭州呀，连夜赶到杭州，第二日早晨头啊，嘞起灵隐寺接驾嗰呐，又是丁一和尚，跑到昭庆寺还是个丁一和尚来接驾，乾隆觉着摇出劲来爻，伊问爻：“那(你们)灵隐寺么也你接驾，昭庆寺呢也要你来接我呢？”丁一和尚啊介话：“老衲出身妙智，住在灵隐，带管呢昭庆。”

乾隆皇帝啊很佩服丁一和尚嗰才能，就叫下手头人呢，拿起笔墨，磨好墨，乾隆皇帝写四嗰大字，“智通无碍”四嗰大字，拿箇个四嗰大字制成蓝底金匾，赐匾畀嘞箇丁一和尚。那么丁一和尚呢，拿箇个匾呢挂嘞个妙智寺内嗰正大厅里。

“智通无碍”这块匾一直挂到“文化大革命”前头，直到红卫兵破“四旧”历史性嗰辰光呢较弄脱爻。

（本辑完。欢迎在本文最下方发布你的评论）