【上海闲话】老上海过七夕要吃“巧果”、姑娘们要出门摘凤仙花……

老早个辰光啊，上海地区辣辣七夕呢流行交关“乞巧”个习俗。迭个一天，家家户户侪要拿麦粉、芝麻、白糖搅拌均匀，摊辣台子浪向用擀面杖拿伊擀薄，然后呢㫰到半干了再切开来，折成“同心结”个样子，摆进油锅向氽到颜色金黄再装盆，搿种物事啊称为“巧果”，吃“巧果”带有“乞巧必果”搿个意思，所以秦锡田个《周浦塘竹枝词》里向：“薄薄铺平盘巧果，新翻花样费平章。”

更加有趣个是，迭一天啊小姑娘辣辣日里向，侪要搭档出门去摘凤仙花，然后捣汁染红自家个手指头，传说呢搿个会得让手指头变得灵巧，所以李行南个《申江竹枝词》里向讲：“金凤染成红指甲，玉尖片片弄桃花”；

乃末妇女呢辣辣迭一天个夜里向，侪要对仔着月亮光比赛用彩线个来穿绣花针，啥人速度快就算是“得巧”，所以倪绳中个《南汇县竹枝词》里向讲：“弯弯凉月挂银河，七夕穿针兴若何。”

考究个人家哦，搿天个夜到头啊还要辣辣庭院或者是天井里向头搞“乞巧会”，供桌浪向摆仔瓜果、鱼肉脱仔好酒，让小姑娘脱妇女点香烛遥拜牛郎星、织女星，祈求能够提高自家个女红技艺，难怪啊丁宜福个《申江棹歌》里向讲：“乞巧筵开露满庭，夜深还自拜双星。”

七夕个主要活动是“乞巧”，而且呢多数是由小姑娘脱妇女来参加个，所以也称为乞巧节、女儿节。迭个节日个习俗啊，一直到上世纪个六十年代还辣辣上海个乡下头延续，后来呢慢慢叫个消失了，只有“巧果”作为一种大家侪欢喜个传统点心流传了下来。

最近几年啊，勿少个年轻人又赋予七夕新个内涵了，拿伊作为“中国情人节”，迭个呢倒也是蛮有趣个。