王君馨、钟舒漫专访：相识十年却走了两个方向

东网专访：王君馨与锺舒漫最近推出跳舞快歌，明言要“做自己”。二人虽然认识多年，却从未一起真正工作，筹备新歌时矛盾爆发，皆因锺舒漫人如其名锺舒“慢”，王君馨则够“轻”快，幸而她们互补不足，学懂欣赏对方的优点。

锺舒漫与王君馨相识近10年，一个在乐坛打滚多年，另一个则在电视圈打出名堂，虽然工作范畴不同，两人私底下却十分老友，近日更推出合唱跳舞快歌《隐型》，传达“做自己所想”的讯息。她们为了这个“BB”，由零开始一手一脚亲自策划，连服装及排舞师等细节亦绝不假手于人，但这对认识了近10年的朋友，原来相处时亦有矛盾。

王：王君馨 锺：锺舒漫

锺：其实我哋识咗咁耐都冇真正一齐做过嘢，就算系同个妹（锺舒祺）做嘢，都有好多矛盾位。今次我同王君馨呢个Project，大家成日都要见同倾，好多嘢要面对同解决，就会睇到两个人有唔同。我哋有一点系几清晰嘅，我人如其名，叫锺舒“慢”，真系比较慢啲！

王：我系王君馨，系“轻”快啲嘅！

锺：我会慢慢唔出声住，或者去到最尾先出声，因为我系要去到最尾，睇埋结果系点嘅人。

王：你系会接受咗先，呢一点我系欣赏嘅！你会谂吓先，锺唔锺意都会欣赏咗先，无论系排舞定服装，你会谂一谂先。但我呢？我觉得有问题就要早讲，如果唔系人哋Firm晒先话“我觉得咁样都唔系咁好。”觉得会浪费时间，因为可能系无綫文化，大家都好急，所以有咩大问题就要即刻讲先，啲小问题自己解决到就解决咗佢！

锺：反而我觉得今次几好，大家有个互补咁。有时我迁就环境同个人，或者想理解嗰个人嘅状况，可能呢个系人哋嘅最尽呢？如果系你，你会觉得大家有时间，叫对方畀多个最好嘅版本我哋。咁好啦，我就即管再试啦，又真系得㗎喎！

王：我都觉得进步咗好多，好多时我一发现有问题就会同你讲，但依家会问你睇唔睇到个问题先，如果睇唔到就会学你欣赏吓先，谂多一阵，会唔会听日就接受到呢？以前可能就会直接讲多啲。之前临尾嗰几个月，我一发现问题会同你倾咗先，有时大家意见一致咪改啰，但有时意见相反，好似画面会乱，灯光会怪怪哋，喺呢个时候我哋会将问题交畀第三者，例如导演同其他人做决定。

锺：好开心同你做呢个Project，因为朋友嚟讲，我哋关系会有一大进步，More than姊妹，系姊妹中嘅姊妹！

王：有时我见你发光发亮，我会提点自己要同你讲，你一听到某啲音乐，唔需要我提点就会自然兴奋。

艺术家情人　你Like我唔Like

做朋友的通常臭味相投，才能成为真正知己，但谈及感情世界，两人喜欢的对象却大有不同。

王：我个人急啲躁啲，艺术家真系唔啱我！

锺：你会忟啰，你应该会闹“你谂紧乜呀？你讲紧乜呀？”

王：系呀！如果要日日生活，我未必跟到一个艺术家啰！有时艺术家系唔Make Sense，我觉得同呢啲人做到朋友，但一生一世呢，明明迟到但仲话个蛋煮得唔系几好，其实都迟到啦，仲讲？快啲食啦！