她是冻龄美魔女 曾想过自杀 如今成人生赢家

冻龄美魔女“伍姑娘”伍咏薇，前晚喺微博贴出同广告界名人老公练海棠头贴头嘅sweet sweet合照，并以“相识非偶然……倒数结婚18周年 认识…… 18年+8个月好不容易……懂吗？”，替两人嚟紧7月1 日结婚18周年大日子提前放闪！

化花生为玉帛 赢尽掌声

伍咏薇同老公能够甜蜜迎接结婚18周年，呢种幸福，绝非必然！事关上年呢个时间，正正就系练海棠被爆密会大胸女，全港花生友等住睇伍姑娘嚎哭爆喊之时！但伍姑娘凭着出色嘅公关手腕、广阔胸襟同坚毅嘅个性，向全港“不懂拆招的女人”，完美示范咗身为女人就算被把刀插住个心，眼泪在心里流，都仍可以一力拆掂：“我代练海棠讲声唔好意思，佢自己玩完泥沙，要老婆出嚟执手尾！”轻易化花生为玉帛，赢尽掌声。事关呢个时世， 眼泪唔值钱，反而坚强，先可以令男人走唔出五指山！

义字行头 一吻解千怨

讲真，伍姑娘有咩风浪未见过？月头佢就同断交六年嘅陈山聪“一吻解千怨”，正式复交，净系呢份广阔胸襟已经赢咗唔少人！想当年，陈山聪唔知发乜神经，失惊无神打畀契姐伍咏薇掟低句“你以后唔好再搵我！”伍姑娘虽然莫名其妙但都尊重对方决定，答句：“好呀！”从此冇搵山聪。事后山聪曾喺电台解释：“嗰阵同人玩紧‘真心话大冒险’，觉得佢玩得，所以打畀佢！”哗，言下之意即系怪责伍姑娘唔玩得？伍姑娘不嬲义字行头，一向玩开型，你叫以后唔搵，咪唔搵啰，好巴闭！不过近日见山聪连日本“偶遇”呢招都出埋，又喺社交网站留言“一吻解千怨！尽在不言中！ I love you ！”拥World Cup咁阔嘅胸襟的伍姑娘，当粉笔字抹晒。

嗒完人夫 斟茶认错

真正有诚意嘅道歉系点？睇吓女中豪杰伍咏薇嘅示范！话说伍姑娘当年21岁，就嫁畀著名会计师事务所高级合伙人51岁嘅翁江培，但婚后13日，老公急性心肌梗塞猝逝，短短两个礼拜内，经历结婚、守寡，畀着其他人，癫咗啦！虽然伍姑娘都有过精神几乎崩溃、想自杀、酗酒嘅日子，但佢冇一沉不起，不过女人始终系感情嘅动物，喺呢个时间有个有妇之夫对佢嘘寒问暖，结果双方暗交四年，直到伍姑娘决定斩缆，仲约对方老婆见面，斟茶认错，伍姑娘比相传坦承斩断樱桃树嘅华盛顿更够姜！因为华盛顿阿爸唔会斩华盛顿，但大婆随时打到你bra都飞甩埋，再发誓“三生三世，掘你桃花”，以泄心头之恨！

无论练海棠、陈山聪定好似唔系好锺意同女人玩嘅蔡一杰，都对伍姑娘有赞冇弹，事关做女人如果净系骚在骨子里，咁就太表面，应该好似伍咏薇咁，企喺男人前面永远唔会独沽一味、匿喺男人下面被男人压住㗎！而当男人想女人配合佢哋大男人需要嘅时候，好似做港男评判睇啲靓仔咁，伍姑娘就连氧气罩都自备，再自动波加送高潮眼，话知你只系扮高潮，总之男人最受落！做到咁样张弛有致、一下松时一下紧咁，试问仲边有男人走得出你五指山？

最新剧集《赌城群英会》《踩过界》就在公众号：夜听港剧