出事喇！虽然呢期股市畅旺，恒生指数创一年半新高，但各位睇路呀！事关“跨世代男神”郑少秋，锁定5月同大家庆祝佢出道50周年！以往冇秋官作品推出嘅5月，市场已经有“Sell in May and go away！”、“五穷六绝七翻身”等共识，今年“逢七必灾”撞正“丁蟹效应”，两大魔咒拍门，个市会点？睇怕北海道名物“熊出没注意！”都系唯一答案！
讲真，Nuts哥对秋官冇任何不满，即使有人统计过，“丁蟹效应”超过30次中到应一应，但作为成熟嘅投资者，Nuts哥冇怪秋官，因为投资人士除咗Call之外，系可以Put㗎嘛！比起“丁蟹效应”，Nuts哥更加相信“你要坐Benz靠自己个脑！”乜都赖，秋官喂埋你食好唔好？
风流倜傥型足50年
其实秋官呢位N世代男神认真厉害，由1967年同陈宝珠合作首部电影《黑煞星》，到50年后嘅今日，由排骨秋、大侠秋、扮嘢秋到丁蟹秋，佢依然不言休！无论扮演张无忌、楚留香、陈家洛定乾隆，秋官都系咁风流倜傥，据讲佢为咗一个眼神，可以练足半年，为求动作潇洒儒雅，甘于对镜不断练习，难怪冧尽两岸三地万千少女心！现实中嘅佢仲经历三段婚姻，俘虏咗金牌司仪同台湾女星，即使秋官今天已年届70，但唔使人扶，唔使撑拐杖， 兼夹仲保持到体态与状态魅力无限，好似太阳咁温暖，试问当今娱乐圈有几多个有咁嘅魔力？
当然，扮过泽田研二、米高积逊、郭富城嘅秋官，扮嘢才华唔简单，但最令Nuts哥写个“服”字嘅系，做惯大侠嘅佢后来一转戏路，演活咗野蛮暴戾、满口歪理、无赖中嘅无赖－丁蟹！虽然香港今时今日满街都系蛮不讲理嘅丁蟹，但当年根本冇办你跟，不过秋官依然将呢个角色演成经典，事实上，要游走于正邪之间，演大侠与演无赖都拿捏精准绝非易事，就如小说家卡夫卡讲过：“邪恶太了解善良，但善良毫不了解邪恶。（Evil know of the good, but good does not know of evil.）。”本名黄可忠嘅郑少秋，曾被同父异母妹妹黄晴雯爆料：“他知道我妈身体不好，特别请人帮我妈按摩、治疗”、“他到台北拍剧，特地趁空档请我和母亲到饭店聚餐”，百善孝为先，可想而知，秋官当年演丁蟹下过一番苦功！
唔信邪随时“望乡”
虽然秋官讲明唔识唱乖女郑欣宜嘅大热金曲《女神》，但呢位“跨世代男神”大把名曲，完全应付不同场合需要，好似新年应景要唱“年年欢乐，欢乐年年”，劈酒Happy当然唱爆“饮胜咁至醒”，如果熊年杀到埋身，秋官一样有歌唱到，嗰首热爆《香港料理》就有句：“不如储钱过二千年啰！”呢句绝对充满大智慧，佢唔系叫你揸货过2000年，注意不是Year 2000年，而系2000 Years，讲嘅系数字唔系年份，咪以为揸住唔放就得，佢系劝你喺高位要识先行沽货食胡，袋袋平安好过，跟手数住银纸等睇“丁蟹效应”有几灵！之后又喺低位入番，咁至可以搵到二千年嘅钱嘛！至于唔信佢嗰套、特别唔信邪嘅股民，揸住成仓蟹货，搞到入秋都返唔到家乡，到时想唔唱《天涯孤客》嗰句：“秋深倍念家乡，最断肠！”都唔得啦！
商务合作QQ/微信：24502371(注明合作)
剧集客服微信：sys0469114
