༼ཨ་མ་ལགས༽
གྱེར་འདོན། འཆི་མེད།
ཨ་མ་ལགས། ཨ་མ་ལགས།
མཚན་མོ་འདིར་ཟླ་འོད་ལ་བཀྲག་མདངས་མེད་པས་གུས་མོའི་སེམས་པ་གྲང་ཅང་ཅང་།
རབ་རིབ་ཀྱི་སྐར་ཚོགས་ཁྲོད་།
ཡིག་དྲུག་དབྱངས་སུ་ལེན་བཞིན་། དག་པའི་ཞིང་ཁམས་རེ་བའི་ཉམས་ཆུང་གི་བུ་མོ་ང་།
ཁྱེད་རང་དྲན་བཞིན་ཡོད་།
ཨ་མ་ལགས། ཉི་འོད་ལ་དྲོད་ཁོལ་མེད་པས།
གུས་མོའི་སེམས་ཁམས་སྟོང་ལྷང་ལྷུང་དུ་འགྱུར་།
ལང་ལོང་གི་སྤྲིན་ཚོགས་འོག་རང་གཅེས་ཀྱི་དཔེ་ཆར་བལྟ་བཞིན། འབྱུང་འགྱུར་ལ་རེ་སྨོན་བཅངས་པའི་ཉམས་ཆུང་གི་བུ་མོ་ང་།
ཁྱེད་རང་དྲན་བཞིན་ཡོད།
ཨ་མ་ལགས། ལོ་ཟླ་ཡི་འཁོར་བགྲོད་འདི་དག་ནང་།
དཔྱིད་གསུམ་གྱི་རླུང་འཚུབ།
དབྱར་གསུམ་གྱི་དྲག་ཆར། སྟོན་གསུམ་གྱི་ལས་བྲེལ། དགུན་གསུམ་གྱི་གྲང་ངར་། ཡོད་ཚད་ཀྱི་ཡིད་ཚད་།
ཚར་རྒྱུ་མེད་པའི་ཕལ་པའི་ཁྱིམ་ཚང་གི་སྐྱིད་སྡུག་འདིས།
སྐུ་ཉིད་ཀྱི་ལངས་འཚོ་དེ་ལྟར་བགྲེས་དུས།
གུས་མོའི་དམར་ཆུང་གི་སྙིང་ཁམས་ཡང་ཡང་དྲག་ཏུ་འགུལ་བཞིན་འདུག ཨ་མ་ལགས།
ཁྱེད་ལ་དེང་དུས་ཀྱི་ཤེས་ཡོན་མི་ལྡན་ཡང་ལྷད་མེད་ཀྱི་ལྷག་བསམ་ལྡན་།
ཨ་མ་ལགས། རླབས་ཆེན་གྱི་ཨ་མ་ལགས། ཁྱེད་ལ་མཚན་དང་སྙན་གྲགས་ཀྱི་གོ་ས་མེད་ཀྱང་། བྱམས་དང་སྙིང་རྗེ་ཡི་ཐུགས་རྒྱུད་མངའ། ཨ་མ་ལགས་བརྩེ་ལྡན་གྱི་ཨ་མ་ལགས། ཁྱེད་ནི་ལས་ལ་བརྩོན་ཞིང་དཔའ་ངར་དང་ལྡན་། ཁྱེད་ནི་ཡ་རབས་ལ་བརྩི་ཞིང་། བབ་ཆགས་ཀྱི་འཚོ་བར་མཉེས། ཁྱེད་ནི་རྒྱུ་འབྲས་ལ་བརྩི་ཞིང་། ཉམས་ཆུང་གི་འཚོ་བར་འབད་། ཁྱེད་ནི་དྲང་བདེན་གྱི་འཚོ་བར་རོལ་བའི་ཆེས་ཉམས་ཆུང་ཚུལ་ལྡན་གྱི་བུད་མེད་ཤིག ཨ་མ་ལགས། གུས་མོ་ཕལ་པའི་ཁྱིམ་ཚང་འདི་རུ་སྐྱེས་པ་བསོད་ནམས་ཡིན་ལ། གུས་མོ་ཕལ་པའི་ཁྱིམ་ཚང་འདི་རུ་འཚར་བ་བདེ་སྐྱིད་ཀྱང་ཡིན་། ཨ་མ་ལགས། བུ་མོས་ཁྱེད་ཡང་ཡང་དྲན་། ཨ་མ་ལགས། གུས་མོས་བཅུད་ལྡན་གྱི་རྩམ་པ་ཟ་བཞིན་དུ་། ཁྱེད་རང་དྲན་། ཨ་མ་ལགས། གུས་མོས་དཀར་འཇམ་གྱི་བལ་གོས་གྱོན་བཞིན་། ཁྱེད་རང་དྲན་། ཨ་མ་ལགས། གུས་མོས་ད་དུང་བཅུད་ལྡན་གྱི་རྩམ་པ་དང་དཀར་འཇམ་གྱི་བལ་གོས་ལས། ཁྱེད་ཉིད་ཀྱི་དྭངས་གཙང་གི་ཐུགས་སེམས་དང་བབ་ཆགས་ཀྱི་འཚོ་བའི་རོ་བཅུད་ཚོར་བཞིན་དུ་། ཁྱེད་ལ་དད་གུས་བཞུ་བཞིན་ཡོད་། ཨ་མ་ལགས། གུས་མོའི་སེམས་དབུས་ཀྱི་སྒྲོལ་མ་དཀར་པོ། ཨ་མ་ལགས་གུས་མོའི་སྙིང་ཁོངས་ཀྱི་བྱང་སེམས་ཆེན་པོ། ཨ་མ་ལགས། ཨ་མ་ལགས། ཨ་མ་ལགས།
明日藏历 སང་ཉིན་ལོ་ཐོ།
གཞིས་རྩེའི་དྲ་ཐོག
点击“阅读原文”，即可查看“视频”，也可寻找你想要的更多内容。。。
