༼ ཁ་པར་གྱིས་དབང་བསྒྱུར་བྱས་ཟིན་པའི་ང་ཚོ། ༽
--རོང་རེ་འབོད།
ཁྱེད་ནི་དུས་རབས་གསར་པའི་གྲོགས་གསར་ཞིག
ཁྱེད་ནི་ཚན་རིག་གི་གྲུབ་འབྲས་ཤིག
ཁྱེད་ཀྱིས་ཐག་རིང་གི་ཕ་མ་སྤུན་མཆེད་དང་གྲོགས་པོ་གྲོགས་མོ་འཕྲལ་མར་མིག་མདུན་དུ་འཆར་བར་བྱེད་ལ།
མི་དང་མི་ཕན་ཚུན་འབྲེལ་ཟམ་བཙུགས་མཁན་གྱི་ཕོ་ཉ་ཞིག་ཀྱང་བྱེད།
ངོ་མ་ཁྱེད་ཅི་འདྲའི་ཡ་མཚན་པ་ཞིག
ཁྱེད་ལ་འཛམ་གླིང་མིག་མདུན་དུ་འཆར་བའི་འཇོན་ཐང་ཡོད་ལ།
ཁྱེད་ལ་སྐྱེ་བོ་མཐའ་དག་དབང་དུ་འགྱུར་བའི་རྫུ་འཕྲུལ་ཞིག་ཀྱང་ལྷག་པར་ཡོད་སྲིད།
ཚན་རིག་གི་རླབས་སྒྲ་འཕྱུར་བའི་དུས་རབས་འདིར་ཁྱེད་ཅི་ནས་ཀྱང་ག་བཏང་གོ་ཆོད་ཤིག
འོན་ཀྱང་། ཁྱེད་ཡོད་པས་རྐྱེན་གྱིས་སྤྱི་ཚོགས་ཀྱི་གོམས་སྲོལ་མང་དག་ཞིག་རིམ་བཞིན་ཡལ།
ཁྱེད་ལ་ཕུན་སུམ་ཚོགས་པའི་རོལ་རྩེད་དང་།
བརྙན་འཕྲིན། གླུ་གཞས། མཛེས་པར། ཕྲན་འཕྲིན་ལ་སོགས་ནུས་པ་མང་དག་ཅིག་མཆིས།
ཁྱེད་ཀྱིས་མི་མང་པོ་ཞིག་རོལ་རྩེད་ཁོ་ནར་མགོ་འཁོར་བཅུག་པ་དང་།
མང་པོ་ཞིག་བརྙན་འཕྲིན་དང་། མཛེས་པར། ཕྲན་འཕྲིན་ནི་དེ་བས་ཀྱང་བརྗོད་ག་ལ་དགོས།
མདོར་ན། རྒན་པ་ཁྱིམ་གྱི་ཕ་རྒན་ནས་གཞོན་པ་བྱིས་པ་ས་མེད་དག་ནས་ཁྱེད་ལ་མགོ་འཁོར་བཞིན་པ་ནི་ཅི་འདྲའི་མི་བཟང་བ་ཞིག
བུ་ཕྲུག་གིས་ཕ་མར་ཁ་ཡར་མི་བྱེད་པར་ཁྱེད་ཁོ་ན་ལ་གཅེས་ཏེ་འཚམས་འདྲིའི་སེམས་གཏམ་བརྗོད་པའི་ཁོམས་པ་ཞིག་ཀྱང་མ་མཆིས་ལ།
ཕ་སྤུན་མཉམ་དུ་སེམས་གཏམ་གླེང་རྒྱུ་ནི་དེ་བས་ཀྱང་ལྟ་ཅི་སྨོས།
ཁྱོ་ཤུག་ཡང་རང་རང་སོ་སོའི་འཕྲིན་ཕྲན་ལ་རོལ་བཞིན་བརྩེ་བ་བརྒྱབ་བསྐྱུར་ལ་ཉེ།
ཐ་ན་སློབ་གྲྭ་ཆེ་འབྲིང་ཆུང་གསུམ་གྱི་གསར་བུ་དག་ཀྱང་ཁྱེད་ཀྱི་བརྩན་འཛུལ་བྱས་ཟིན།
གང་ལྟར་ཀྱང་། ཕྱོགས་གང་སར་མགོ་སྒུར་ངང་ཁྱེད་ལག་ཏུ་ཐོགས་ཏེ་གཞན་ལ་བལྟ་ཁོམས་ཀྱི་དུས་གཅིག་ཀྱང་མེད།
དེས་ན་སྣང་མེད་ཞིག་ལ་འཚོ་བའི་ནང་དུ་མེད་དུ་མི་རུང་བ་ནི་ཁྱེད་གཅིག་པུ།
ཁྱེད་ཀྱི་ཕ་མའི་ཚབས་བྱེད་ལ། གྲོགས་པོ་གྲོགས་མོའི་ཚབས་ནི་དེ་བས་ཀྱང་ངོ་།
ཁྱེད་ནི་ངོ་མ་རླབས་ཆེན་ཞིག་རེད་ཨང་།
ཁྱེད་ཡོད་པས་བུ་ཕྲུག་གི་ཕ་མའི་བཀའ་དྲིན་མི་ཚོར་ལ།
ཁྱེད་ཡོད་པས་སློབ་མས་ཤེས་བྱའི་གནས་ལ་མི་བརྩོན།
ཁྱེད་ཡོད་པས་གཞོན་པ་རོལ་རྩེད་དང་།
རྒན་པ་བཟའ་མི་ཕུང་ལ་སྦྱར།
ཁྱེད་ངོ་མ་འཇོན་ཐང་ཅན་ཞིག
ག་དུས་ཁོམས་པ་ཡོད་ཀྱང་། ཁྱེད་ལ་བལྟ་ཙམ་མ་བྱས་ན་སེམས་མི་བདེ།
ཞོགས་པ་མལ་ལས་ལང་བ་ནས་དགོང་མོ་གཉིད་མ་ཁུག་པར་ཁྱེད་དང་བྲལ་བར་དཀའ།
ཁྱེད་ནི་ཞོགས་པ་ལངས་བའི་བརྡ་གཏོང་མཁན་དང་།
དགོང་མོ་ཉལ་བའི་གཉིད་ལ་འགུག་མཁན་ཞིག
ཁྱེད་མེད་ན་ཕལ་ཆེར་འཚོ་བ་འཁྱོལ་བ་དཀའ།
འོན་ཀྱང་ལེགས་པར་བསམ་ན་དེ་ལྟར་ཡིན་ནམ།
ངའི་ཁ་པར་ལ་དགའ་བའི་གྲོགས་ཚོ་བསམ་གཞིགས་ཤིག་གནོང་དང་།
སྤྱི་ཚོགས་འདི་རུ་ཁ་པར་མེད་ཐབས་མེད།
དོན་དང་མཐུན་པའི་བེད་སྤྱོད་གཏོང་བ་ལས།
རྒྱུན་ལྟར་དེ་ལ་འཁྱུད་ན་ག་ལ་འགྲིག
བརྩེ་བའི་ཕ་མ་སྤུན་དང་གྲོགས་པོ་ཚོར།
དུས་དང་རྣམས་པ་ཀུན་ཏུ་འབྲེལ་བ་གྱིས།
ཁ་པར་འཇིག་རྟེན་ཆུང་ཆུང་དེ་ཡི་ནང་།
ཉི་མ་གང་འཁྱོལ་ངང་ནས་སྡོད་པ་ལས།
ཕུགས་བསམ་འགྲུབ་པའི་ཤེས་ཡོན་སྦྱངས་ན་དགའ།
འཕྲིན་ཕྲན་འཕྲིན་ཐུང་མང་པོ་བསྐུར་བ་ལས།
དཔེ་ཀློག་དང་ནི་སྲི་ཞུ་བསྒྲུབས་ན་སྐྱིད།
མཛེས་པར་ཐལ་གཏོང་ཆོ་མེད་སྨྲ་བ་ལས།
རང་འཁྲིའི་ལས་ལ་འབད་འབུངས་བགྱིས་ན་དགའ།
ཁ་པར་ལག་ཏུ་འཛིན་དྲགས་ན།
འདྲེན་བྱེད་མིག་གཉིས་ལོང་བར་གྱུར།
འཕྲིན་ཕྲན་རྩེད་མོར་གཡེང་དྲགས་ན།
དོན་མེད་ཕུང་ལ་སྦྱོར་ཉེན་ཡོད།
མཛེས་པར་ཐལ་གཏོང་དགའ་དྲགས་ན།
རིན་བྲལ་དུས་ཚོད་བརླགས་པར་ངེས།
འཕྲིན་ཐུང་ཁ་པར་གཏོང་མང་ན།
སྦ་ཁུག་སྟོང་པར་འགྱུར་ཡོང་ངོ་།
ང་དང་ང་འདྲའི་རིགས་མཐུན་སྤུན་ཟླའི་ཚོགས།
ཁ་ཡོད་ལག་ཡོད་དོན་དངོས་བྱ་བ་ལ།
འབད་བརྩོན་ཆུ་བོའི་རྒྱུན་བཞིན་བསྟེན་པ་ལས།
ཁ་པར་ཁོ་ནར་དབུ་སྐོར་མ་ཞུ་ཨང་།
ང་རང་ནས་འགོ་བཙུགས་པའི་ཁ་པར་དང་ཁ་བྲལ་ཐབས་མེད་པའི་སྤུན་གྲོགས་ལྷན་རྒྱས་ལ་སེམས་བརྩེའི་ཚུལ་དུ་དེ་རིང་ནས་བཟུང་ཁ་པར་གྱི་བཙན་དབང་དུ་མ་ཚུད་པར་སོམ་ཏེ་བསྐྱར་དུ་སྤེལ།
༢༠༡༧/༡/༤ཉིན། རིན་སྤུངས་སུ།
明日藏历 སང་ཉིན་ལོ་ཐོ།
གཞིས་རྩེའི་དྲ་ཐོག
点击“阅读原文”，即可查看“视频”，也可寻找你想要的更多内容。。。
