【沪语】“侬姓啥？”上海人的姓氏读起来嘎有噱头啊！

音频请点击↓↓↓

上海人辣海朋友道里相互介绍起来个辰光，有一眼姓讲起来蛮噱头个，拨北方人听起来是有眼奇怪，有眼多此一举。

最常见个是姓黄搭姓王个朋友。辣海上海闲话里，声母hu跟w是一样个，所以上海人讲起来是黄、王勿分个，侪读wang。比方下头迭段对话：

迭段对话辣上海人当中再正常勿过了，但拨了北方人听起来就云里雾里了。明明一个黄（huang）一个王（wang）清清爽爽个，拨上海人一讲就讲得复杂了。更加有意思个是，假使侬听到讲着普通话个人辣海讲，“我姓黄，草头黄”个辰光，搿位朋友呆板数就是上海人。

顺便讲一句，上海人相互介绍起来侪是直哔哔个问“侬姓啥”，勿大会客气来兮个讲“请问贵姓”。

跟黄、王勿分类个还有姓wu的。辣海上海闲话里头，吴、胡、何、贺也是勿分个，统统侪发wu。迭记介绍起来就更加麻烦了。伊姓吴，口天吴；伊姓胡，古月胡；伊姓何，人可何；伊姓贺，加贝贺。辣辣普通话里向光从读音就分得煞煞清的事体，用上海闲话讲起来 变得交关啰嗦。另外还有比较少见个武wu跟扈hu，因为勿大好拆开来讲，上海人就常庄利用古人名人来介绍了，伊姓武，武松个武；伊姓扈，扈三娘个扈。

百家姓里排了前头个姓里向还有勿少蛮搞也蛮噱个，最典型个是姓chen姓zhao，辣海上海闲话里头呒没翘舌音也呒没后鼻音，z搭c也常庄勿分，所以上海人发迭些音起来就一天世界了。

比方讲陈、郑、程三个姓，普通话是分得清清爽爽个，上海闲话就混辣一道去了，介绍个辰光就勿得勿多啰嗦一眼，解释一番。

“我姓陈，耳东陈”，用个是组字结构来说明。

“我姓郑，奠耳郑”，迭个也是组字结构，但用个是繁体字结构，一般勿讲关耳郑个。

“我姓程，禾木程”，迭个也是组字结构，但自家也勿晓得迭个“木”是啥个意思。

上海闲话里头还有三个常见个zhao姓。

“赵”常庄也用繁体字个结构来说明，我姓赵，走肖赵。用个是繁体字个组字结构。

“我姓曹，曲日曹”。虽然迭个曹个上部并勿是曲，但一直将就辣海用。或者也有借用名人典故个，“曹操个曹”。

“我姓邵，刀口邵”。索性就借用了半边字个结构来说明。还好基本上呒没姓召个，否则就要混起来，介绍起来更加啰嗦了。

总个来讲，老上海人讲上海闲话常庄是比较啰嗦个，也是习以为常个。就像自我介绍起来，用普通话来讲，也照样是“我姓陈，耳东陈”个多此一举。不过现在个小上海人普通话邪气标准，前鼻音后鼻音、翘舌音平舌音，还有声母W、Hu搭仔Z、S、C侪分了煞煞清，再也勿需要辣海介绍个辰光多啰哩啰嗉了。

资料：学上海话 微信（作者：陈坚）

编辑：黄骞文、谢真

音频：牛美华