王君馨化身烈女苏丽珍　Cool样劲有杀气

王家卫执导嘅电影《花样年华》播出至今，依然系唔少人心目中嘅经典电影，当中女主角张曼玉嘅多款旗袍造型更系令人难忘。近日，王君馨拍摄咗一个广告，化身烈女版“苏丽珍”，仲学足当中嘅经典造型，而广告亦去咗怀旧冰室及旧街等地方取景，有几幕犹如置身于《花》嘅场景，向呢套经典电影致敬。

点解话王君馨系烈女版“苏丽珍”？皆因佢一身50-60年代嘅打扮，几似张曼玉喺《花》嘅经典造型，而广告中饰演侍应嘅佢对一名男客人一见锺情，之后竟然大胆倒追对方，劲有性格，仲唔系名副其实嘅烈女！唔少网友都话王君馨好适合复古风LOOK，做50-60年代嘅角色甚有韵味，自然成功演绎今次嘅角色。佢哋仲大赞广告拍得有心思，处处都有怀旧气息。

明明呢个广告系讲述昔日香港嘅爱情故事，点知一众网民太入戏，竟然将王君馨喺剧集《心理追凶Mind Hunter》嘅冷血角色“汪海澄”代入广告，留言话：“见到王君馨就觉得佢好有阴谋”、“佢一恶我就谂起佢想杀人”有网民仲话见到王君馨喺广告中露出唔耐烦或cool嘅表情，都觉得佢下一秒要化身“汪海澄”大开杀戒，咁夸张？！咁都证明王君馨真系好好戏，令“汪海澄”喺大家心目中留下深刻嘅印象，只不过做正面角色都畀人觉得有杀气，相信王君馨睇完都唔知好嬲定好笑啦！

网民有话儿：
XXlisChXX：佢一恶我就谂起佢想杀人......
JoeXXXXXam：而（依）家见到王君馨就觉得佢好有阴谋！
KaiManNXXX：其实个女仔被海澄杀死咗，因为佢想个男主角爱上佢，之后再利用佢。
XXXinCho：条女撞咗王君馨一下，硬系觉得之后会被暗中杀害。

剧集客服微信：xiaoli-0007