现时香港社会女多男少，正所谓僧多粥少，港女唔愁就有鬼！未去到3字头，身边冇人追就已被列入“剩女”嗰栏，其实好多剩女条件绝对唔系“翘口巉手”，好似朱千雪咁，拥有最强嘅“三高”：高学历、高收入、高颜值！可惜成也三高，败也三高。千雪BB曾经大呻，感情生活由成年之后一直Dry到依家，一个咁高质素嘅女仔竟然咁多年都“未开Dry”？听到都心噏！
当年无綫搞花臣玩全民普选港姐，千雪BB民意一枝独秀，谂住冠军实食无黐牙，点知临门一脚网上投票“冧Server”，喺冇数据支持下，后冠咁就跌咗！千雪BB 做唔成民选港姐，但短短五年竟然反高潮变咗“离地港女”，高不可攀！大家认知嘅“港女”代表拜金、爱名牌、装可爱、扮娇嗲，好似早排嗰位出晒位嘅港女Seasun就目标为本，讲明“有楼有高潮”。在供求社会下，相信能Offer得起嘅男人都好Buy呢种伟论，只要对症下药满足各自要求，男人反而觉得呢种港女够直接简单，容易到手。
擸云梯都高攀唔起
偏偏千雪BB非我族类，冇“公主病”之馀仲患“三高”，高到用云梯都去唔到佢嘅Level。佢简单一句：“楼？唔使，我有啦！”呢股霸气足以K.O晒一班有楼港男，莫讲话冇楼港男唔敢埋身，有楼都未必敢啦？一啲“冇脑冇墨水”嘅男人，面对千雪BB唔自卑都难！
虽然千雪BB未及麦明诗攞十优兼剑桥毕业，但佢学无止境嘅求学心态就轻易赢晒，喺港大攞到硕士学位都仲未够皮，又去埋城大读法律。女仔太叻太强，唔多唔少都影响爱情运！
男人就系咁衰，有时就系锺意啲女仔一副冇主见嘅样，仲要高八度崇拜Mode咁问你：“真系㗎？点解嘅？你好叻呀！”而将“港女Tone”演绎得最完美传神的，首推梗系吴若希啦！呢啲就算千雪BB读几多书、日日返学都学唔到㗎！
代沟阔过城门河
千雪BB想打烂“Dry钵”都几头痕，尤其要喺圈中搵到个衬得起佢嘅笋盘，数嚟数去，睇怕暂时只有IQ、EQ、AQ（逆境商数）、MQ（道德商数）乜Q都掂嘅子华神──黄子华，先可以降伏到佢！子华神之所以被人封为神，皆因佢知识广博、转数快唔在讲，仲系香港栋笃笑鼻祖！你估吹水真系咁易？喺红馆讲足几粒钟，都要用气用神，一开口就要一气呵成，掌握咩位令你愈听愈高潮！论身家，子华神话你知，佢完全唔使靠父干，单凭佢嘅金舌头已经扫咗唔少砖头！论学历，子华神同千雪BB都同样喺加拿大大学毕业，够晒同声同气嘞啩！
样样都符合，好似好Perfect，但系拍拖唔系好似to-do list咁，全部剔晒就得！拍拖最好玩嘅地方，系有时你估我唔到！对住一个太聪明嘅女人，佢几欣赏你都好，但系做乜都被佢估到，边够过瘾？再讲，子华神同千雪BB年纪相差成28年，年纪同思想个gap阔过城门河。讲人生阅历同经验，子华神正宗食盐多过你食米，求其讲一句，千雪BB有冇咁多斤両接招先？讲到呢度，千雪BB又唔好咁灰，爱情始终要嚟就嚟，等白马王子嚟之前，增值自己读多啲书之馀，都学吓点样做一个女人，撒娇女人最好命！
商务合作QQ/微信：24502371(注明合作)
剧集客服微信：sys0469114
