རྒྱང་རིང་གི་ཡིད་འཕྲོག་ལ་ཕུལ་འདོད།
ཤངས་ཕུན་ཁང་བསྟན་འཛིན་བཀྲ་ཤིས་ནས།
2017年02月20 湖南
རི་རབ་ཀྱི་ཕ་མཐའ་ན།
རྒྱང་ཐག་ཆོད་པའི་ཡུལ་ཞིག་ན།
ངའི་སྙིང་གི་ཡིད་འཕྲོག་ལྷ་མོ་བཞུགས་ཡོད།
མར་མེ་འདྲ་བའི་ཁོ་མོའི་འོད་མདངས་དེས།
ངའི་མདུན་ལམ་ལ་དཀར་ཆ་གནང་སོང་ལ།
གངས་རི་འདྲ་བའི་ཁོ་མོའི་ལྷག་བསམ་དེས།
ངའི་མདུན་ལམ་ལ་རྩ་ལག་རྒྱས་སོང་།
ཡིད་འཕྲོག་མ།
དཔྱིད་ཀྱི་མྱུ་གུས་ས་གཞི་འགུལ་དུས།
ང་ནི་ཡུལ་གཞན་ཞིག་ནས་ཁྱེད་རང་དྲན་གྱི་ཡོད་ལ།
དཔྱིད་རླུང་སིལ་བུའི་ཀློང་ནས་མིག་ཆུ་བཏང་གི་ཡོད།
ཡིད་འཕྲོག་མ།
དབྱར་ཟླའི་ཆར་ཟིམ་ཐང་ལ་ལྷུང་དུས།
ཁྱེད་དྲན་པའི་ན་ཟུག་གི་མིག་ཆུ་ཐང་ལ་ཐོར་སོང་ལ།
ཡིད་སྐྱོ་ཞིང་ངའི་སྙིང་གི་ཤ་འགྲིམ་ཡང་གས་སོང་།
ཡིད་འཕྲོག་མ།
སྟོན་ལོ་སེར་པོ་རླུང་གི་དེད་དུས།
ངའི་ཡ་ཐོད་ནས་ནག་ཅིང་སྣུམ་པའི་སྐྲ་རྐང་རེ་གཉིས་ཙམ་རླུང་གི་དེད་ཞོར།
ལྷང་ལྷང་དྲན་པའི་ངའི་སེམས་པ་དེ་ཡང་ཁྱེད་ཀྱི་ཕྱོགས་ལ་དེད་སོང་།
ཡིད་འཕྲོག་མ།
གྲང་ངར་གྱི་འདམ་པའི་དགུན་ཁ་དེར།
གྲོང་ཁྱེར་དེའི་མི་རྣམས་དགུན་ལྭ་མཐུག་པོ་རེ་གྱོན་ནས་ལྕགས་རྟ་གཞོན་ཏེ་ལས་གྲྭར་བསྐྱོད་དུས།
ངས་མེ་ལྕེ་འདྲ་བའི་ཁྱེད་ཀྱི་བརྩེ་བ་དེ་ལྷང་ལྷང་ཡིད་ནས་དྲན་གྱི་ཡོད།
ཡིད་འཕྲོག་མ།
སླར་ཡང་ལོ་གཅིག་འདས་སོང་བས།
ཁྱེད་ཀྱི་ཡ་ཐོད་ལ་གཉེར་མ་ཐར་ཐོར་རེ་བཏགས་འདུག་ལ།
ངའི་མིག་ཟུར་དུ་གྲོག་རོང་འདྲ་བའི་ཤུར་ཁ་ཁ་ཤས་ཡང་སླེབས་ཚར་འདུག
དེ་བས་ལྷ་བུ་དར་བུ་འདྲ་བའི་གཅེས་ཕྲུག་དེའི་གོམ་པའི་ལོབས་ཆ་བདེ་རུ་ཕྱིན་པ་མ་ཟད།
ཨ་ཕ་དང་ཨ་མ་སོགས་སྐད་ཆ་དབ་དིབ་མང་པོ་ཞིག་སྨྲ་ཤེས་ཚར་འདུག
ཨ་ཁ་ཁ་་་་་་་་་་་་་་་་་་་་
ངོ་མ་མགྱོགས་པ་ལ།
དུས་ཚོད་མགྱོགས་པ་ལ།
