སྤྱི་ཟླ་༣ཚེས་༦ཉིན། ཉིང་ཤ་ཧུའེ་རིགས་རང་སྐྱོང་ལྗོངས་ཀྱི་རྒྱལ་ཡོང་སྲིད་གྲོས་ཨུ་ཡོན་དབྱང་ཧྥ་མིང་གིས་གྲོས་ཚོགས་ཐོག་གྲངས་ཉུང་མི་རིགས་ཀྱི་རིག་གནས་ཐོན་ལས་གོང་དུ་སྤེལ་དགོས་པའི་སྐོར་གྱི་གྲོས་གཞི་བཏོན་ཡོད་པ་སྟེ། ཁོང་གིས་དེའི་སྐོར་ལ་འདི་ལྟར། ནུབ་རྒྱུད་མི་རིགས་ཀྱི་དམངས་ཁྲོད་རིག་གནས་ཐོན་ཁུངས་སྔོག་འདོན་དང་སྲུང་སྐྱོབ། བེད་སྤྱོད་དང་གསར་སྤེལ་བཅས་གང་ལེགས་བྱས་ཏེ། གྲངས་ཉུང་མི་རིགས་ཀྱི་རིག་གནས་ཐོན་ལས་འཕེལ་རྒྱས་ཤུགས་ཆེན་གཏོང་བ་དེ་ནི་རིག་གནས་འཛིན་སྐྱོང་སྤེལ་གསུམ་བྱེད་པར་ཕན་ཐོགས་ཡོད་པ་མ་ཟད། ལས་གཏོད་དང་ལས་ཞུགས་ལ་སྐུལ་འདེད་ཐེབས་ནས་མང་ཚོགས་ཀྱི་ཡོང་འབབ་འཕར་སྣོན་དང་ཕྱུག་པོར་འགྱུར་བའི་རེ་འདུན་མངོན་དུ་འགྱུར་བར་ཕན་ཐོགས་སྲིད་ཅེས་བརྗོད་འདུག
ཀྲུང་གོའི་ནུབ་རྒྱུད་ས་ཁུལ་ལ་དབུལ་པོ་མང་པ་མ་ཟད། དབུལ་པའི་ཚད་ནི་ཤིན་ཏུ་དབུལ་པའི་གནས་སུ་གྱུར་མོད། འོན་ཀྱང་མི་རིགས་རིག་གནས་ཀྱི་ཐོན་ཁུངས་ཕུན་སུམ་ཚོགས་པ་ལྡན་པས། ནུབ་རྒྱུད་ཀྱི་ཕུན་སུམ་ཚོགས་པའི་མི་རིགས་ཀྱི་རིག་གནས་ཐོན་ཁུངས་དེ་ཐུན་མོང་མིན་པའི་རིག་གནས་ཐོན་ལས་ལ་བསྒྱུར་རྒྱུ་ནི་ནུབ་རྒྱུད་དབུལ་ཕོངས་ས་ཁུལ་དག་ཏུ་གནད་འཕིགས་དབུལ་སྐྱོར་མངོན་དུ་འགྱུར་བའི་ཐབས་ལམ་ནུས་ལྡན་ཞིག་ཡིན། ནུབ་རྒྱུད་ཞིང་ཆེན་དང་རང་སྐྱོང་ལྗོངས་ཀྱི་རིག་གནས་ཐོན་ལས་གོང་དུ་སྤེལ་མགོ་བརྩམས་པའི་དུས་ཚོད་འཕྱི་ཞིང་། ཐོན་ལས་འཕེལ་རྒྱས་བྱུང་ཚད་ལྟོས་བཅས་ཀྱིས་རྗེས་ལུས་ཡིན་པ་དང་། རིག་གནས་ཐོན་ལས་ཕྱོགས་ལ་གསར་གཏོད་ཀྱི་ནུས་པས་མི་འདང་བ་དང་། ཕལ་ཆེ་བ་ནི་འཕེལ་ཤུགས་ཆུང་ཞིང་ཁ་ཐོར་གྱི་རྣམ་པར་གནས་ཡོད་པས། རིག་གནས་ཐོན་ལས་འཕེལ་རྒྱས་ཀྱི་མྱུར་ཚད་དང་ཕན་འབྲས་ཕྱོགས་གཉིས་ཀར་ཤུགས་སྣོན་རྒྱག་དགོས།
ནུབ་རྒྱུད་མི་རིགས་ཀྱི་རིག་གནས་མེ་ཏོག་རྣམ་པར་བཞད་ཆེད། ཨུ་ཡོན་དབྱང་ཧྥ་མིང་གིས་ཀྲུང་དབྱང་གི་རིག་གནས་ཐོན་ལས་གོང་སྤེལ་གྱི་ཆེད་དངུལ་དེ་ཤར་རྒྱུད་དང་ནུབ་རྒྱུད་རིགས་གཉིས་སུ་བགར་ནས་ས་ཕྱོགས་གཉིས་ཀྱི་རིག་གནས་ཐོན་ལས་གོང་དུ་སྤེལ་བར་རྒྱབ་སྐྱོར་བྱེད་རྒྱུ་དང་། ཤར་རྒྱུད་དང་ནུབ་རྒྱུད་རིག་གནས་ཐོན་ལས་འཕེལ་རྒྱས་ཀྱི་དོན་དངོས་ལ་གཞིགས་ནས་ཁག་སོ་སོར་དཔྱད་ཞིབ་ཚད་གཞི་ཐ་དད་དུ་བཟོས་ཏེ། ཁྲིད་སྟོན་སྔར་བས་ཡག་པོ་དང་རིག་གནས་འཛད་སྤྱོད་བྱེད་ཚད་རྒྱ་ཇེ་ཆེར་གཏོང་བ། རིག་གནས་ཐོན་ལས་རིགས་སྒྱུར་དང་རིམ་སྤར་ལ་སྐུལ་འདེད་དང་། ཤར་རྒྱུད་དང་ནུབ་རྒྱུད་རིག་གནས་ཐོན་ལས་མཐུན་སྦྱོར་ངང་གོང་དུ་འཕེལ་བར་སྐུལ་འདེད་གཏོང་དགོས་ཞེས་དང་། རང་བྱུང་སྣོད་བཅུད་ཐུན་མོང་མ་ཡིན་པ་དང་རིག་གནས་རྣམ་པ་སྣ་ཚོགས་ཅན། རིག་གནས་ཐོན་ཁུངས་ཕུན་སུམ་ཚོགས་པ་ལྡན་པའི་མི་རིགས་ས་ཁུལ་དུ་རྒྱལ་ཁབ་ནས་གང་མགྱོགས་ངང་དབུལ་ཕོངས་ས་ཁུལ་གྱི་རིག་གནས་ཐོན་ལས་གོང་སྤེལ་ཁུལ་བཙུགས་ཏེ། ནོར་ཁྲལ་དང་ཞབས་ཞུའི་སྟེགས་བུ། ཤེས་ལྡན་མི་སྣ་སོགས་ཀྱི་ཕྱོགས་ནས་གཙོ་གནད་དུ་རོགས་སྐྱོར་བྱ་རྒྱུ་དང་། དབུལ་ཕོངས་ས་ཁུལ་དབུལ་སྒྲོལ་ཕྱུག་འགྱུར་ཡོང་བའི་གོམ་སྟབས་མགྱོགས་སུ་གཏོང་དགོས་པ་སོགས་གྱི་བསམ་འཆར་བཏོན་འདུག
ཡོང་ཁུངས། ཀྲུང་གོའི་བོད་སྐད་རླུང་འཕྲིན་དྲ་བ།
ཡིག་སྒྱུར། བསོད་ནམས་སྒྲོལ་མ།
