༼ ལོ་གསར་གྱི་འབོད་སྐུལ། ༽
---རོང་རེ་འབོད།
སྤྲོ་བས་ཁེངས་པས་མེ་བྱ་གནམ་ལོ་གསར།
དགའ་ཉེ་སྤུན་མཆེད་འཛོམས་པའི་དུས་བཟང་འདིར།
མ་སྐུལ་སེམས་ཀྱི་དྲན་སྐུལ་ཏིལ་འབྲུ་ཙམ།
ནག་ཆུང་ཡི་གེར་ཕབ་ནས་ཞུ་བར་འདོད།ལོ་གསར་ལོ་གསར་ལོ་གཅིག་དུས་གཅིག་ལ།
ཀུན་གྱི་མཉམ་འཛོམས་དགའ་སྟོན་ཉིན་མོ་འདི།
ཚེས་གཅིག་ཕྱེ་མར་ལུག་མགོ་གཡག་མགོ་དང་།
དེ་ནས་ཆང་དང་དམར་གྱི་སྒོ་མོ་ཕྱེ།
ཚེས་གཉིས་ཁྱིམ་མི་ལྷན་འཛོམས་མགྲོན་ནི་བསུ།
ཤ་པགས་ཟོས་ཏེ་སྦི་རག་ཆང་ལ་རོལ།
དགའ་སྐྱིད་གསུམ་མགྲོན་གཉིས་བཏགས་གསོས་བརྒྱབ་ཅེས།
ཡུལ་སྲོལ་མི་འདྲའི་ཆང་རག་བཀྱགས་ལུགས་ཡོད།
ཚེས་གསུམ་བསང་དགའ་བསང་གསོལ་རླུང་དར་བཙུགས།
དེ་ནས་ཕུད་ཆང་བཞེས་ཏེ་ཡུལ་མི་འཛོམས།
ཞོགས་པ་ཁག་ཅིག་ཤོ་དང་མཱ་ཅང་སྦག
ཆང་རག་འཐུང་བཞིན་རྩེད་མོས་ནམ་ཡང་ལངས།
ཚེས་བཞི་ཚེས་ལྔ་སོགས་ལ་དགའ་ཉེ་སྤུན།
གཟབ་མཆོར་སྤྲས་ཏེ་སྦི་རག་ཤོག་སྒམ་བཏེགས།
དགའ་སྤྲོའི་སྒོ་ནས་ཁྱིམ་མཚེས་སྤུན་མཆེད་སོགས།
ཕན་ཚུན་དབར་ལ་མགྲོན་པོར་བསུ་རེས་བྱ།
ཤ་དམར་སྦི་རག་ཁོ་ནས་རྒྱུན་མཐུད་དེ།
གང་སར་ལོ་གསར་དགའ་གཏོང་བྱེད་པ་དེས།
ཤ་དང་ཆང་གི་ཉེས་དམིགས་ཇེ་ཆེར་དང་།
ལུས་ལ་ནད་གཞི་འདྲ་མིན་ཇེ་མང་རེད།
ལོ་གསར་ཁྱིམ་མི་སྤུན་མཆེད་འཛོམས་པ་བཟང་།
ཨ་རག་ཆང་གིས་ཉེས་སྐྱོན་བསགས་པ་ངན།
གྲོང་མི་ཁྱིམ་མཚེས་མགྲོན་བསུ་བྱེད་པ་བཟང་།
བཟས་ལ་ཤ་དམར་ཁོ་ན་སྤྱོད་པ་ངན།
རང་རང་མི་རིགས་ལུགས་སྲོལ་བཟུང་བ་བཟང་།
ཡ་མ་ཆས་ཀྱི་སྲོལ་ངན་འཛིན་པ་ངན།
བོད་ཆས་སྤེལ་ཏེ་གླུ་གར་རོལ་བ་བཟང་།
ཆང་རག་འཐུངས་ནས་ར་བཟི་བཅུག་པ་ངན།
གསོལ་ཇ་མངར་དང་སྲུབ་མ་སྤྱོད་པ་བཟང་།
ཆང་དང་སྦི་རག་ཨ་རག་སྤྱོད་པ་ངན།
རྒྱན་བཙུགས་མེད་པའི་སྲོལ་རྒྱུན་རྩེད་མོ་བཟང་།
ཤོ་སྦག་མཱ་ཅང་རྒྱན་པོ་འགྱེད་པ་ངན།
བཀྲ་ཤིས་ལོ་གསར་དགའ་བའི་བཀྲ་ཤིས་ཤོག
བཀྲ་ཤིས་ལོ་གསར་འཛོམས་པའི་བཀྲ་ཤིས་ཤོག
བཀྲ་ཤིས་མེ་བྱ་གནམ་ལོ་གསར་ཚེས་ལ།
བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག
གཞིས་རྩེའི་དྲ་ཐོག
点击“阅读原文”，即可查看“视频”，也可寻找你想要的更多内容。。。
