一次可能系意外，两次或者系撞彩，但，三次几乎可以肯定系真正厉害！讲紧嘅系堪称香港特别行政区最佳前度－－廖碧儿！佢，拍过无数次拖，佢拍过嘅男友，好多都获奖无数，佢嘅裙下之臣，粒粒都有头有面！不过全部发生喺同佢分手之后嗰度弊呢！口痕友仲话“最佳前度”？成个娱乐圈被你曲到弯晒啦！
的确，喺廖碧儿较为人熟悉嘅几段情入面，先有前度刘恺威喺分手后，一吐乌气，喺内地爆红做咗一线男星， 仲娶埋内地新四小花旦之一女神级嘅杨幂做老婆，生咗个女小糯米。
继而有前度陈豪，分手后飞跃进步，视帝都攞埋，仲娶咗陈茵媺，兼夹只系用咗三年时间就三年抱三，仲要系想生仔，就生仔，想生女，就生女，剧情照足自己意思发展，更加估唔到嘅系出道初期，把声烂到阿妈都唔认得嘅佢，竟然连我最喜爱的歌曲大奖都攞埋，名副其实系佢嗰句金句：“Perfect池！”同分手前嘅际遇相比，真系天与地！
角色被定型“好胜”
即使圈外前度林忠豪，分手后亦一样“活得比你好”，同咗又靓又叻嘅Susanna Yiu拍拖，感情稳定，鬼咁sweet sweet ！
眼看那倾慕过的、伤害过的、不见光的、不便说的， 从前每个男孩如盛放的花朵，唯独只有廖碧儿自己过尽千帆，依然斯人独憔悴，只能喺旧爱结婚了，新娘不是我之际，喺人哋微博留句：“Congratulation！”本来对旧爱送上祝福都算系大方表现，只怪佢早年回应有指畲诗曼介入佢同陈豪之间时，佢话：“系你嘅就系你嘅，唔系你嘅就唔系你嘅！”听落就同“山系石头，海系水”一样咁上下嘅见解，不过佢嗰个胜利者式嘅笑容，嗰种暗窒阿畲嘅意气风发，搞到被人定咗型话佢好胜，就连佢早轮被指有神秘富豪男友，搬到大埔千万豪宅居住，都话佢专登要住近前度示威。
女版“爱情幸运星”
系咪好胜都好，廖碧儿冇再好似以前咁以胜利者姿态嚟回应咁低EQ，而佢转性嘅转捩点应该系2008年喺温哥华经历咗一场大风雪，佢事后讲：“后来有次我喺法国睇葡萄园，有只蝴蝶停喺我手上，令我有所领悟！”竟然一粒沙里看世界，半瓣花上说人情，你唔觉奇怪嘅咩？虽然佢冇详细讲系咩嘅领悟，但极有可能系佢终于发现咗自己拥有令前度浴火重生，变身火凤凰嘅使命同Magic ！就好似荷里活影星谢茜嘉艾芭同Dane Cook主演嘅《Good Luck Chuck》（爱情幸运星），讲Dane虽然高大靓仔，但佢中咗咒咁，凡系就算再丑再肥再冇人吼嘅女，只要同佢“企一晚”，之后都会即刻搵到幸福好路数！照咁讲，虽然廖碧儿出名系“情场走宝王”，但佢都算系立下好多功德，睇番刘恺威、陈豪、林忠豪，同佢拍过拖、好过、散咗，然后就买埋楼结埋婚做老衬，顺风顺水行好运！
身材正，话晒系华姐冠军，个个数番佢啲前度依家有几好，其实分分钟佢将来嗰个好过班前度一百倍都未定！之不过鬼妹仔嘅佢平时无事不可对人言，点解之后不断传佢有新欢佢都唔声唔声唔表态，就系费事畀人对号入座，万一有咩冬瓜豆腐，真系有第四个临床实证出笼，到时真系水洗都唔清！
商务合作QQ/微信：24502371(注明合作)
剧集客服微信：sys0469114
