袁嘉敏自爆甩拖喷血大解放

袁嘉敏言行不嬲大胆，呢一日佢又喺社交网发功，分别喺ig同微博留下感言，话自己喺新嘅一年放低一段感情。不过最爆唔系佢宣布再次回复单身，而系佢一口气甫咗四张性感相，其中一张仲系全裸照...

寓意重新出发

嘉敏接受东网访问，问到点解要影呢啲裸露相掟上社交网？佢话：“Just means 'take a bath starting fresh！”意指新一年冲完凉后重新出发！问到嗰段放低咗嘅感情系咪指之前个外籍男友？嘉敏话唔想清楚讲边个，总之自己真系放下咗！

前度具知名度

喺再三追问下，嘉敏表示其实去年有段恋情，2016年春天同之前嘅男朋友分手后，就跟呢个男人一起，但又同之前旧爱都拖拖拉拉，佢话2016年嘅男友系一个有知名度嘅人。问呢个人系咪艺人？佢话：“唔系，既然之前冇公开，依家分咗手都想低调。（内地人？）唔系！”佢又自爆寻晚去咗堪舆学家苏民峰屋企，话师傅指佢属鼠，今年事业运唔错，故收拾心情工作，但如果遇到啱嘅，都会尝试发展。