བོད་ཁུལ་གྱི་ལྷ་སྐུ་གསར་རྙིང་ཚོང་རྒྱག་མཁན་ཚོང་པ་དེ་རྣམས་ལ་བོད་རིགས་མང་ཤོས་ཤིག་གིས་དུག་བཞིན་འཛེམ་གྱིན་འདུག སྤྱིར་རང་ཉིད་གཅིག་པུས་བདེ་སྐྱིད་དང་རྒྱུ་ཟས་ཕྲན་བུའི་ཆེད་དུ་ལྷ་སྐུ་ཉོ་ཚོང་བྱས་པ་ཡིན་ན་སྡིག་པ་མེད་ཅེས་སུས་ཀྱང་བཤད་མི་ཐུབ། ཡིན་ཡང་ལྷ་སྐུ་རྙིང་པ་གཅིག་བཙོང་པའི་དབང་དུ་བཏང་། དེའི་རིན་གོང་བརྒྱ་ཆ་བཅུ་མན་ཆད་དེ་དགེ་ཕྱོགས་ཤིག་ལ་གཏོང་ན་དེ་ཡང་མ་རུང་པ་ཞིག་མ་རེད་སྙམ། དཔེར་ན་བརྒྱ་ཆ་བཅུ་ཡར་མར་དེས་ཚེ་ཐར་དང་སྲོག་བླུ་ཡང་ན་དཔལ་འབྱོར་དཀའ་ངལ་ཅན་གྱི་ནད་པ་ཚབས་ཆེན་ཞིག་གི་ཁྱིམ་ལ་སྤྱིན་པ་བཏང་ན་བརྒྱ་ཆ་བཅུ་དེས་མི་སྲོག་གཅིག་བསྐྱབ་པའི་དགེ་བ་སྒྲུབ་ཐུབ་པར་མ་ཟད་གཞན་ཡང་དགེ་བ་མང་པོ་ཞིག་འགྲུབ་ཀྱིན་ཡོད། ང་སྒེར་གྱི་བསམ་ཚུལ་ལ་སྐུ་དེ་ཉིན་མཚན་གང་བོར་མཆོད་སྒམ་ནང་དུ་བཅུག་པ་ལས་བཙོང་ནས་སྒོར་རྡོག་ཕྲན་བུ་རེ་དགེ་ཕྱོགས་སུ་གཏོང་ཐུབ་ན་དེས་ཕན་པ་ཆེ་འདུག་སྙམ།
བདག་ཅག་གིས་སྟོན་པ་ནི་སེམས་ཅན་གྱིས་བདེ་སྡུག་གཟིགས་མཁན་ཞིག་ཡིན་པ་ལས། རང་འདྲ་བའི་ལྕགས་ཟངས་ཀྱིས་བཟོ་སྐྲུན་བྱས་པའི་འདྲ་འབག་ཞིག་བཙོང་ན་སྡིག་པ་ཡོད་ཟེར་མཁན་ཞིག་མིན་བསམ། དེ་བས་ཐབས་སྡུག་ཤོས་ཤིག་ནི་བཤས་ཉོ་བཤས་ཚོང་རྒྱག་མཁན་དེ་དག་རེད་འདུག སྤྱིར་དུས་རབས་ཉེར་གཅིག་འདིས་ནང་ལ་སེམས་ཅན་གྱི་སྲོག་གཅོད་མ་དགོས་ཙམ། ལས་ཀ་འདྲ་མིན་གང་རུང་ཞིག་བྱེད་རྒྱུ་འདུག་མོད། དཔེར་ན་སྐྱེས་པ་དག་ལ་མཚོན་ན་ཨར་ལས་བྱེད་ས་དང་བུད་མེད་དག་ནི་ཇ་ཁང་དང་མགྲོན་ཁང་སོགས་ཀྱིས་ཞབས་ཞུ་པ་བྱེད་ས་ཧ་ཅང་མང་། བོད་མདོ་དབུས་ཁམས་གསུམ་ན་བཤས་ཉོ་བཤས་འཚོང་བརྒྱབ་ནས་ཕྱུག་པོར་ཆགས་ཡོད་རེད་ཟེར་བ་ཞིག་མཐོང་མྱོང་ངམ། ཨར་ལས་དང་ཇ་ཁང་སོགས་ཀྱི་ལས་ཀ་ལའང་ཟླ་བ་རེར་གོར་སྟོང་གསུམ་བཞི་ཡར་མར་ཡོད་པ་རེད། ཁྱེད་རྣམས་ཀྱིས་སེམས་ཅན་གྱི་སྲོག་གཅོད་ནའང་ལོ་རེའི་ཁ་ཟ་ཁ་ཐོན་ཙམ་ལས་འདང་གི་མེད་པ་ཀུན་གྱི་ཤེས་གསལ་རེད། གཞན་ལས་ཀ་གང་རུང་བ་ཞིག་བྱས་ན་ཁྱེད་ཅག་ལྟོགས་ཤི་མི་ཐེབས་པ་གསལ་གསལ་རེད། གཞན་གྱི་ཚེ་སྲོག་བཅད་ནས་འཚོ་བ་སྐྱེལ་པ་དེ་ནི་སངས་རྒྱས་ཆོས་ལུགས་ཀྱིས་ངོས་ནས་བཤད་ན་འདྲ། དེང་གི་ཚན་རིག་གི་ཐོག་ནས་བཤད་ནའང་འདྲ་བྱ་བ་གང་དང་ཡང་མི་མཐུན་པའི་ངན་སྤྱོད་ཀྱི་བྱ་བ་ཚབ་ཆེན་ཞིག་རེད།
གལ་ཏེ་ལས་རྒྱུ་འབྲས་ཞེས་པ་འདི་དྲང་བདེན་ཅན་ཞིག་ཡིན་ན། དབུགས་ཡོད་ཀྱི་སེམས་ཅན་སྲོག་གཅོད་པ་དང་། དབུགས་མེད་ཀྱི་འདྲ་སྐུ་ཉོ་ཚོང་བྱས་པ་གཉིས་ནི་སྡིག་པ་ཆེ་ཆུང་ཁ་ཁ་རེད་འདུག་སྙམ།
__སྨྱུག་གླིང་གིས། 2017_1_31ཉིན།
རྩོམ་ཁུངས། ལུག་ཚང་།
